Промени во зонското паркирање во Гостивар – дел од паралелното преминува во косо

Јавното претпријатие надлежно за паркинзите во Гостивар најавува промени во зонското паркирање, со цел да се обезбедат дополнителни места за паркирање и да се скратат нервозите и маките на возачите и сообраќајците.

Планирано е дел од паралелното паркирање да премине во косо. Анализите каде има потреба и услови тоа да се спроведе, веќе се направени, а периодов течат подготовките за теренските работи. На овој начин во градот ќе се добијат околу 250 паркинг места плус.

„Направивме физибилити студија и од овој месец ќе започнеме со промени во начинот на зонското паркирање, од паралелно на косо. Така ќе се креираат нови паркинг места, и тоа околу 250. Актуелно располагаме со 840 места за паркирање.“, информира Беким Челебиу, директор на ЈП за паркинзи и зеленило.

За надминување на проблемот со немање доволно паркинг-места во Гостивар, локалната самоуправа во повеќе наврати најавуваше изградба на катна гаража. Според последните најави, објектот би започнал да се гради напролет, а би се ставил во функција наесен.

Претпријатието предвидуваше воведување на зонски паркинг и на ул„Беличица“, но полицијата утврди дека долж оваа улица нема услови за такво нешто.