Просечната возраст на вработените во јавната администрација е 45 години

Во јавните институции на Република Македонија, кои ги има 1.291 на број, вработени се вкупно 129.653 лица. Податоците се содржат во Годишниот извештај на Регистарот на вработени во јавниот сектор, кој денес Министерството за информатичко општество и администрација го презентираше на јавноста.

Просечната возраст на вработените во јавната администрација изнесува 45 години со околу една година разлика меѓу мажите и жените. Меѓу јавните административци, најмлади се девет вработени, на возраст од 19 години. Најстарите, вкупно 21, имаат по 67 години.

Во однос на образованието 485 се без образование, 270 се полуквалификувани, 412 се квалификувани, 9.236 се со основно образование, 36.310 со средно образование, 4.883 се висококвалификувани, 6.515  со вишо образование, 48.322 со факултет, 2.107 се магистри, а 1.771 се доктори на науки.

Во однос на етничката структура има 82.900 Македонци, 21.279 Албанци, 1.781  Турци, 1.272 Срби, 1.215 Роми, 479 Бошњаци, 478 Власи, а 907 се други или не се изјасниле.

Над 19 илјади вработени има во Армијата на Република Македонија, Агенцијата за разузнавање, Министерството за внатрешни работи и органите во негов состав со статус на овластени службени лица.