„Тепачки“ за брзи ковид тестови во аптеките во Гостивар

Силниот удар на коронавирус што Гостивар го трпи периодов, ги натера граѓаните да ги полнат аптеките. Најмногу се бараат витамини за подигнување на имунитетот, антибиотици (сумамед, оспен) препишани од лекар како терапија, но и брзи ковид тестови. Во неколкуте аптеки кои денес ги посетивме рекоа дека продавале 60 до 70 такви тестови дневно. Голем дел од граѓаните кога ќе почувствуваат некакви здравствени проблеми и ќе се посомневаат на коронавирус се одлучуваат првично на ваков начин да проверат дали се позитивни. Тестовите ги купувале и луѓе кои биле во контакт со потврден заразен.

„Многу е голема побарувачката за брзи тестови. За начинот на нивна употреба има  упатството кое е важно да се следи, правилно да се земе брис од носот, потоа се допира на одредена точка на тестот и за кратко се добива резултатот. Има тестови од различни производители, а цените се од 400 денари нагоре“, рекоа во една од гостиварските аптеки.

Брзите тестови кои ги продаваат аптеките се само како индикативни, а не официјални ковид тестови. За релевантен резултат тестирање мора да се спроведе во овластена лабораторија.

Она што се поставува како прашање е дали граѓаните чии резултати се позитивни на коронавирус на брз тест, потоа се упатуваат на тестирање во лиценцирана лабораторија. Само со направен брз тест, тие не се евидентираат во систем на заразени, што значи дека не добиваат решенија за изолација. Доколку немаат посериозни симптоми и немаат потреба од лекарска помош, останува на нивната совест и одговорност дали ќе се самоизолираат дома или ќе продолжат да се движат меѓу луѓе со што потенцијално го загрозуваат здравјето на сите околу нив.

Фармацевтите рекоа дека дел од граѓаните периодов бараат и ивермектин, антипаразитски лек со широк спектар на делување, кој во одредени случаи се користи и за третман против ковид.