Учениците од Гостивар ќе се вклучат во Глобалната недела на парите

Глобалната недела на парите (27 март ‒ 2 април) во Македонија се одбележува со повеќе активности кои се насочени кон едукација на децата и младите на теми од областа на финансиите. Информативните средби и предавањата ги организира Координациското тело на регулаторните институции за финансиска едукација кое го сочинуваат Народна банка на Република Македонија, Министерството за финансии, Агенцијата за супервизија на осигурувањето, МАПАС и Комисијата за хартии од вредност.

И учениците од Гостивар во рамки на Глобалната недела на парите ќе имаат можност да научат нешто повеќе за штедењето, банкарскиот сектор, инвестирањето, осигурувањето, пензискиот сектор и други теми поврзани со функционирањето на финансиските системи. Според најавите, предавањето ќе се спроведе следната недела.

-Целта на активностите е да се подигне нивото на финансиска писменост кај младото население, да се поттикнат младите да инвестираат во својата иднина, истакнувајќи ја важноста на раната финансиска едукација, со што им се помага да станат свесни за своите финансиски права, и да ги развиваат финансиските вештини, нагласуваат организаторите.

Глобалната недела на парите, на светско ниво ја спроведува Меѓународната организација за финансиска едукација на деца и млади (Child and Youth Finance International). Годинешното мото гласи: „Учи! Штеди! Заработи!“. Оваа глобална иницијатива ја подигнува свеста кај младите преку учење за тоа како функционираат парите, вклучувајќи го штедењето, вработувањето и претприемаштвото.