„Заедно Mожеме“ отвори канцеларија во Гостивар за лицата со посебни потреби

За помош, поддршка, консултации, совети, лицата со посебни потреби од поширокиот гостиварски регион, отсега ќе може да се обраќаат во посебен Информативен центар. Канцеларијата за оваа намена ја отвори Здружението за лица со посебни потреби “Заедно Можеме” од Гостивар, а се наоѓа во објектот на Јавното претпријатие „Комуналец“.

„Канцеларијата стои на услуга на граѓаните на општините Гостивар, Врапчиште и  Маврово-Ростуша и ќе функционира како информативен ценар за деца и лица со посебни потреби. Ќе пружаме помош при обезбедување на права и услуги за децата и лицата со посебни потреби, состаноци, консултации, реализација на проекти и заштита на дискриминација како и за сите други намени кои ќе се јават како потреба“, рече Шпенди Салија, претседател на Здружението.

На отворањето на Инфо центарот присуствуваа претставници од општината, јавното претпријатие, Центарот за социјални работи, граѓани и родители на деца со посебни потреби.

„Излеговме во пресрет на здружението и обезбедивме простор, а ќе продолжиме и во иднина да ги поддржуваме ваквите иницијативи, кои се во корист на граѓаните со посебни потреби “ , рече Исак Лазами, директор на ЈП Комуналец.

Салија најави дека следен проект што планираат да го реализираат во Гостивар, а кој е голема потреба за родителите, е Центар за децата со церебрална парализа.