70-те социјални станови во Гостивар уште чекаат оглас и станари

Зградата со социјалните станови во Гостивар и по скоро две години од завршување на градбата, се‘ уште нема станари. Објектот има поминато технички прием, но распределбата на становите за социјалците се врти во лавиринтот на административните процедури.

Најпрво мораше да се прави нова методологија за рангирање, поради измени во Законот за социјална заштита, каде беа утврдени нови категории граѓани кои ќе можат да аплицираат за стан. Потоа, заради одредени измени во тек на градбата, беше неопходно да се дополнува урбанистичката документација.

Последното одложување на доделувањето, според појаснувањето на министерот за транспорт и врски Благој Бочварски биле одредени проблеми во софтверот, преку кој електронски ќе се селектираат добитниците на станови.

„Имаше одреден проблем со распределбата преку софтверската куќа што вршеше распределба. Министерството за траснпорт и врски направи нов софтвер, заедно со стручните лица во Министерството веќе го става во функција и после тоа ќе бидат распишани повиците. Според уредбата, распределбата се врши по електронски пат преку таков софтвер. Во наредниот период ќе биде распишан повикот, и ги повикувам да го следат и да аплицираат во што е можно поголем број, затоа што во некои општини имавме случаи каде ни се пријавуваа мал број и не можевме да извршиме распределбата.“, рече Бочварски.

Министерот не даде конкретен одговор, кога конечно ќе биде објавен јавниот повик за распределба на становите. „За точно кога ќе биде објавен повикот ќе ве информираме. Секако, има рок од 60 дена граѓаните да аплицираат, да се запознаат со условите, и сето тоа да биде на транспарентен начин“, рече тој

Зградата има два влеза и 70 стана. За нив ќе може да аплицираат станбено необезбедени:деца без родители, корисници на гарантирана минимална помош, граѓани погодени од елементарни – природни непогоди, семејства со лица со попреченост, социјално загрозени припадници на Ромската заедница како и самохрани родители со малолетни деца.