Хуманитарен фолклорен концерт во Гостивар

Во четврток (8 јуни) во гостиварскиот Центар за култура АСНОМ ќе се одржи првото издание на манифестацијата „Полог пее“. Организатор на настанот е Здружението за култура „Анисија“, а во програмата учествуваат гостиварското културно уметничко друштво „Браќа Ѓиноски“ и нивните колеги од тетовското друштво „Иљо Антески Смок“.

„Целта ни е преку една ваква манифестација да придонесеме за зачувување на традиционалните вредности на овие простори и запознавање на помладите генерации со нивните корени“, велат организаторите.

Влезот е слободен, а манифестацијата има хуманитарен карактер. Волонтери хуманитарци ќе постават кутија за донации во која посетителите ќе може да го дадат својот прилог. Собраните пари ќе се наменат за помош на загрозени категории граѓани.

Концертот „Полог пее“ е поддржан од Министерството за култура, Општина Гостивар и Центарот за култура. Почетокот е закажан за во 19 часот.