Сообраќајците во Гостивар „изгореа“ скоро 400 пешаци и 117 возачи од јануари до октомври

Во изминатите десет месеци од годинава на подрачјето на СВР Тетово вкупно се изречени 908 мерки за недавање предност, односно за непропуштање на пешаци, најчесто на обележани пешачки премини или на други места. Од нив на тетовско подрачје 791, а на гостиварско 117.

На сите возачи-прекршители изготвени им се соодветни поднесоци и зависно од видот и карактерот на прекршокот ќе се соочат со парични глоби од 150 до 250 евра во денарска противвредност, извести полицијата.

Во истиот период мерки им биле изречени и на 775 пешаци (Тетово-377 и Гостивар-398), претежно за преминување на улиците надвор од обележани пешачки премини или за непочитување на светлосна сообраќајна сигнализација.

И ним им се изготвени поднесоци, а паричните глоби за ваквите прекршоци предвидени во Законот за безбедност на сообраќајот на патиштата се движат од 30 до 50 евра во денарска противвредност, со напомена дека дел од пешаците биле повикани и на таканаречена сообраќајна поука.

Секторот за внатрешни работи Тетово со апел до возачите секогаш и секаде да им даваат првенство на пешаците, а тие,пак, да се придржуваат на сообраќајните правила и прописи и да не ги преминуваат улиците каде ќе стигнат, но и да не се движат по коловоз. На тој начин и едните и другите ќе придонесат за поголема безбедност на пешаците и за намалување на бројот на сообраќајни несреќи со повредени или загинати.