На Табановце запленета поголема количина на суплементи

Од страна на царинските службеници на ГП Табановце на влез во државата, при контрола на товарно моторно возило се запленети поголема количина на непријавени суплементи и украсен камен, информира Царинска управа.

„Поради основано соменевање, на товарното моторно возило со македонски регистарски таблички и управувано од македонски државјанин, беше извршена детална контрола и притоа се пронајдени 490 пластични шишиња со по 30 портокалови капсули и 150 ленти со по 12 зелени таблети со непозната материја и без ознаки, како и амбалажа картонски кутии и лепенки со ознаки за суплементи за слабеење. Дополнително, во возилотото се пронајдени и непријавени 51 кутија со украсен камен за градежништво.“, стои во известувањето за заплената која се случила на 8 март.

Непријавената стока е привремено одземена и поради елементи за сторено кривично дело, предметот е предаден на понатамошна постапка на Одделението за истраги на Царинската управа, по што ќе бидат поднесени соодветни пријави.