Агенција за храна: Се` уште има опасност од птичји грип, забраните за увоз остануваат на сила

Опасноста од птичји грип е помала, но се` уште актуелна, оценуваат од Агенцијата за храна и ветеринарство на Република Македонија. На сила остануваат воведените забрани за увоз на жива живина, производи и нус производи од живина од регионите каде во соседна Бугарија каде кон крајот на минатиот месец беше потврдено последното позитивно жариште на болеста, како и забраните за увоз од неколку европски земји.
Надлежните апелираат до одгледувачите на живина, комерцијалните одгледувачи и домаќинствата да се одржува високо ниво на биосигурносни мерки на фармите.

„Апелираме живината и другите птици да се држат на начин со кој ќе се ограничи нивното движење надвор од живеалиштата, а треба да се внимава и да се спречи контакт на домашната живина со диви птици. Од особена важност е да не се врши поење и хранење на живината во дворовите за да не се привлече вниманието на дивите птици. За да се спречи појава и спречување на евентуално ширење на оваа болест, задолжително да се врши превентивна и тековна дезинфекција на превозните средства за живина и диви птици, јајца за ведење, производи и нус – производи од живина и мрши. Од исклучителна важност е да се внимава во јатата да не се внесува живина со непознат здравствен статус, а до надлежното ветеринарно друштво или официјалните ветеринари да се пријави промената во здравствената состојба на живината или зголемената смртност“, се наведува во соопштението од АХВ.

Исто така се апелира до ловџиите по враќање од лов задолжително темелно да се измијат пред да стапат во контакт со живината, а облеката користена за лов да не се користи во контактот со живината.