Формиран локалниот Совет за превенција во Гостивар

Денес во кабинетот на градоначалникот Арбен Таравари се одржа конститутивната седница на локалниот Совет за превенција на Гостивар, тело во кое членуваат првите луѓе на општината, полицијата, судот и јавното обвинителство. Советот ќе се посвети на справување со проблеми врзани околу безбедноста, девијантни појави, сообраќајот, елементарни непогоди и слично, на територијата на општината.

„Сакаме да испратиме порака до граѓаните дека институциите функционираат, се почитуваат и дека се подготвени да соработуваат и заеднички да делуваат за да се превенираат проблемите. Се надевам дека ќе бидеме добар пример за сите други општини. Се договоривме да имаме состаноци секоја втора недела, односно првиот и третиот понеделник од месецот. Денес на конститутивната седница се запознавме едни со други, одредивме начини на соработка, а веќе на наредниот состанок ќе имаме конкретен дневен ред“, изјави градоначалникот.

Постојани членови на Советот за превенција се градоначалникот, командирот на ПС Гостивар, челните луѓе на Основиот суд и Јавното обвинителство. Во работата по потреба се вклучуваат и други институции, зависно од темите и проблематиката.