Новата Амбасадорка на САД, Кејт Брнс се почести со гостиварска баклава

Новата американска Амбасадорка во земјава, Кејт Брнс ја вкуси гостиварската баклава и го пофали специјалитетот, по кој Гостивар надалеку е познат.

Амбасадорката била во Охрид, а на враќање кон Скопје поминала низ Гостивар и се почестила со парче баклава од слаткарницата Рекорд. Дека за Брнс баклавата била превкусна, беше споделено на официјалната фејсбук страна на Амбасадата на САД.

Брнс официјално стапи на функцијата Амбасадор на САД во земјава, пред неколку дена. Таа дојде на местото на Џес Бејли.

За гостиварската баклава се вели „Кој еднаш пробал парче гостиварска баклава, секогаш ќе навраќа за повеќе“. Традиционалната гостиварска баклава си има свој мајсторлук и не е нешто што може секој да го стокми како што треба. Корите се сучат рачно со сукало и треба да бидат многу тенки, проѕирни, филот е со ореви, а одозгоре се ставаат ф`стаци. И секако, шербетот мора да биде погоден, за вистинскиот шмек на ова мало благо задоволство.