Уживање во гостиварската природа – Ден за параглајдинг, велосипедизам и пешачење крај Вардар

Љубителите на природата и авантуристите вчера во Гостивар имаа исполнет и интересен ден на активности под наслов „Fly, bike and hike“. Беше организиран марш со велосипеди од општинската  зграда до филтер-станицата во Вруток, како и пешачење во природа, покрај реката Вардар од Вруток се` до градот. За оние, пак кои сакаа да пробаат како е во воздух, имаше летање со параглајдер со старт во селото Корито, а спуштање во селото Чегране. Настаните имаа за цел промовирање на спортот како вредност и возење велосипед како еколошки и здрав начин на превоз. Учество зедоа професионални параглајдеристи и велосипдисти, како и заинтересирани граѓани.

Активностите се одржаа во рамки на проектот “Зајакнување на одржливоста против насилен екстремизам на локалните заедници во Македонија”, кој е поддржан од Амбасадата на Обединетото Кралство и Амбасадата на Кралството Холандија, во соработка со Општина Гостивар.
Во нив се вклучија и градоначалникот на Гостивар, Арбен Таравари во придружба на британската амбасадорка Рејчел Галевеј и заменик-амбасадорот на Холандија Андри Ван Менс.