Имате ли 530 евра месечно за основни трошоци?

За да ги задоволи основните потреби во текот на едномесечен период, на четиричлено семејство му е потребен буџет од 32.653 денари. Толкава е вредноста на синдикалната минимална кошница за месец јули, што ја пресмета Сојузот на синдикати.

За што се неопходни овие пари? Според ССМ најмногу од сумата, 13.574 денари одат за храна и пијалоци, по што следуваат трошоците за домување (комуналии, покуќнина и одржување) со износ од 10.409 денари. За лична хигиена и хигиена во домот, семејствата треба да одвојуват 2.306 денари од буџетот, за превоз, околу 2.408 денари, додека за облека и обувки 2.177 денари.

Најдолу на листата, со најниски суми се културата и здравјето. Според пресметките, посетата на културни манифестации чини 1.070, а лекови и прегледи 706 денари.

Според Државниот завод за статистика, просечната нето плата во мај изнесувала 25.270 денари. Ова значи дека семејство со еден вработен, не може да ги покрие основните трошоци за живеачка. Ако се знае дека многу од работниците добиваат плата под просекот, се поставува прашањето како народот се снаоѓа да врзе крај со крај?