Состојба на патиштата-Влажни коловози, забрани и задолжително користење зимска опрема

Сообраќајот на државните патишта се одвива по влажни коловози, наместа со остатоци од кашест снег по интервенцијата на дежурните екипи на ЈП Македонија Пат, соопшти АМСМ.

Од 7.55 часот на патниот правец Прилеп – Кавадарци преку планинскиот превој Плетвар задолжителна е употреба на зимска опрема за тешките товарни возила. За останатите видови на возила сообраќајот се одвива непречено во зимски услови.

Поради интензивни врнежи од снег, силен ветер и намети, на патниот правец Тетово – Попова Шапка се воведува забрана за сообраќај за сите видови на возила. На патниот правец Тетово – г.п.Јажинце е задолжителна употреба на зимска опрема за сите видови возила.

Од 7.55 часот на патниот правец Делчево – г.п. Делчево се воведува задолжителна употреба на зимска опрема ( синџири ) за тешките товарни возила.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има појава на утринска магла и можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.