АХВ со препораки за пазарување храна во време на пандемија на Ковид 19

Агенцијата за храна и ветеринарство упати повеќе совети и препораки до граѓаните, како да го направат побезбедно купувањето на храна во време кога владее пандемијата на коронавирус.

Надлежните советуваат да се пазарува во најблиските продавници, бидејќи со тоа се ограничува и скратува времето на движење надвор од домот.

„Задржете се што пократко во продавницата, со тоа што ќе направете список дома за вашите потребни намирници и  така ќе го скратите времето на престој во продавниците за храна. Кога избирате храна во вакви услови, најдобро е да изберете прехранбени производи кои вообичаено ги купувате, така што не морате детално и целосно да ги читате иформациите од етикетите, бидејќи тие етикиети од  претходно ви се познати. Задолжително направете визуелен преглед на амбалажата или производот, односно проверете дали амбалажата е оштетена и проверете  ги органолептичките својства. Задолжително проверете  го датумот на производсво, односно рокот на траење.“, препорачува АХВ.

Понатаму на граѓаните им се препорачува да користат маска и ракавици за време на пазарењето, а користените ракавици за еднократна употреба по напуштањето на продавницата да ги фрлат во канта за отпадоци.

По завршување на пазарењето и излегувањето од продавница, дезинфицирајте ги рацете со препорачано средство за дезинфекција, нагласуваат од Агенцијата.