Анализа: Кои се најчестите симптоми на заболените со Ковид 19 во Македонија?

Во земјава до сега се потврдени 483 заразени лица со коронавирус. Според податоците кои ги објави Институтот за јавно здравје, од нив, 23,7% се хоспитализирани во текот на болеста, а останатите случаи се на домашно лекување и во домашна изолација, асимптоматски или со полесна клиничка слика.

Во однос на симптомите кои се пријавени кај заболените лица, најчесто се регистрирани: кашлица (64,1%), температура (63,2%), слабост (33,6%), главоболка (22,0%), треска (19,1%), болка во грло (17,1%) и отежнато дишење (16,4%). Анализата покажува дека 126 лица биле без изразени симптоми.

Во однос на пол, регистрирани се 230 машки и 253 женски лица. Возраста на заболените се движи од 2 до 91 години (просек – 44,9 години). Најголем број на заболени се на возраст над 60 години – 101 (20,9%).

Проценката на ризик на СЗО на глобално ниво и на ниво на Европски Регион за понатамошно ширење на COVID-19 кажува дека ризикот е многу висок.

Според категоризацијата на ризикот од СЗО, Инситутот за јавно здравје проценува дека:

• Дебар е во фаза 4 (широко-распространета трансмисија во заедницата).
• Скопје е во фаза 4 (широко-распространета трансмисија во заедницата).
• Куманово е во фаза 4 (широко-распространета трансмисија во заедницата).
• Останатиот дел од Република Северна Македонија е во фаза 3 (локализирана трансмисија).