Православен празник Задушница, на сила е забрана за посета на гробиштата

За православните христијани денес и утре е празникот Задушница, кој се одбележува во спомен на починатите од семејството. Годинава поради воведената забрана за посета на гробиштата (освен за погреб), која трае до понеделник, граѓаните не можат да го одбележат денот според верските обичаи и традиција, кои налагаат посета на вечните почивалишта, принесување на пченица, лепче, вино и споменување на имињата на блиските покојни од страна на свештениците.

Во недела се празнува Духовден, празник кој го означува слегувањето на Светиот Дух врз апостолите. Празникот уште се вика и Света Тројца затоа што на едно место се јавуваат Таткото, Синот и Светиот Дух. Со одобрение на Богот-таткото се исполнило ветувањето на Богот-син, дадено пред апостолите дека ќе им го испрати Светиот Дух. Со слегувањето на Светиот Дух врз апостолите, тие се исполниле со љубов кон Бога и со желба да го величаат. Овој чин се смета за основање на Христијанската црква.