Во Гостивар рекордни 95 казни за неносење на маска

Изминатото деноноќие дури 95 лица во Гостивар и гостиварско добиле казни затоа што не носеле заштитни маски. Податокот е од дневниот извештај на полицијата за спроведените активности и контроли во однос на почитувањето на мерките за заштита од коронавирус. На подрачјето на Тетово бројот на казнети е уште поголем и достигнува 119.

Според Уребдата на Владата, носењето заштитна опрема на устата и носот е задолжително во сите јавни објекти како државни институции, маркети, продавници, банки, пошти, јавен превоз, чекални, здравствени институции и слично, како и на отворени простори, секогаш кога не може да се одржува минимална дистанца од два метри меѓу граѓаните.

Заштитна опрема не е задолжителна за граѓаните кои престојуваат во двор на станбена семејна куќа, возат велосипед или спортуваат на отворено, (но со задолжително одржување на дистанца од два метри растојание), ако патуваат во моторно возило со лица кои заедно живеат,  како и ако се наоѓаат на отворено каде може да одржуваат дистанца од два метри.

Казните за непочитување се во висина од 20 евра во денарска противвредност за физичките лица, а за компаниите каде не се почитуваат мерките за носење заштитна опрема за вработените и посетителите, предвидена е казна од 2.000 евра во денарска противвредност.