2,5% од криминалните дела во полошко ги прават деца

Педесетина малолетници во гостиварско-тетовскиот регион, минатата година „заработиле“ пријави за кривични дела. Според анализите на полицијата, децата, лани во вкупниот криминалитет на подрачјево, учествувале со 2,5%.

Најголемиот број од малолетниците се осомничени за учество во кражби (12) и тешки кражби (8). Карактеристично е тоа што четворица од нив извршиле кражби кај родители или блиски роднини. Покрај ова, лани малолетници биле извршители и на шест кражби на автомобили.
„Може да се издвои тоа што во извршувањето на тешките кражби, децата во значителен број, биле непосредно поттикнати и координирани од повозрасни лица, кои на ваков начин ги искористиле за релизирање на нивните криминални активности“, вели портпаролот на СВР Тетово, Марјан Јосифоски.
Извесен број малолетници незаконски се однесувале и кога станува збор за безбедноста на сообраќајот, злоупотребувале лични податоци на социјалните мрежи или учествувале во насилства и тепачки со други лица.
Многу од сторителите на малолетничкиот криминал и претходно биле дел од вакви или слични кривични дела.