Ќе се обележуваат нови патеки за велосипедистите во Гостивар

Се подобруваат условите за велосипедистите во Гостивар. Забележливо е дека во последно време, се поголем број на граѓани ги користат велосипедите. Некои како превозно средство, некои рекреативно. Соодветната инфраструктура е основна потреба за да можат велосипедистите безбедно да се движат во сообраќајот.

Локалната самоуправа и јавното претпријатие за паркинзи и зеленило во следниот период ќе обезбедат дополнителни велосипедски патеки во должина од околу 1,5 километри.

„Во пресрет на Европската недела на велосипедизам, планираме обележување на нови велосипедски патеки во Гостивар, од околу 1,5 километри. Тие ќе бидат бојадисани со црвена боја и со соодветна сигнализација. Ќе опфатат дел од раскрсницата кај бензиската на Макпетрол, низ новоизградената улица, до градскиот стадион, преку паркот до реката Вардар односно мостот кај судската зграда“, вели директорот на претпријатието Беким Челебиу.

Неодамна велосипедски и пешачки патеки беа обележани долж шеталиштето на Вардар.