Невработените да се пријават во Центрите во рок од 30 дена, во спротивно бришење од евиденција

Откако повторно беше воспоставено редовното пријавување на невработените (15 септември 2020) околу 54 илјади лица доцнат со пријава во евиденцијата, соопштија надлежните.

Директорот на Агенцијата за вработување Абдуш Демири ги повика да се обратат во Центрите за вработување и дисперзираните канцеларии за да ја регулираат својата обврска во рок од 30 дена, односно најдоцна до 19 март, петок. Активните баратели на работа треба да се пријавуваат на секои 30 дена, додека другите лица кои бараат работа или пасивни баратели на работа на секои 6 месеци.

„Јавно ги повикуваме сите оние лица кои ги надминале роковите за пријава во евиденцијата на АВРСМ во наредните 30 дена почнувајќи од утре, да дојдат во Центрите за вработување каде се евидентирани за да ја регулираат својата обврска како активни или пасивни баратели на работа. Апелираме до сите лица кои ќе дојдат да се евидентираат во Центрите за вработување да ги почитуваат мерките за заштита од вирусот КОВИД-19 пропишани од Министерството за здравство, да носат заштитна маска и да одржуваат соодветна дистанца од другите лица“, нагласи директорот.

Невработените лица кои нема да ги исполнат своите обврски во рок од 30 дена согласно Законот за вработување и осигурување во случај на невработеност се бришат од евиденцијата на невработени лица и можат повторно да се пријават по истекот на една година, а корисниците на права по основ на невработеност го губат и правото.