Свадби надвор под протоколи наскоро, ако ковид бројките продолжат да опаѓаат – вели Филипче

Капацитетот на исполнетост во болниците ширум државата е меѓу 20-30%, што е значително намалување на притисокот врз болниците. Голем број на ковид центрите се затворени, до крајот на неделата и одделенијата во зградата на интерните клиники се очекува да бидат вратени во нормала, информираше на денешната прес конференција, министерот за здравство Венко Филипче.

На новинарско прашање околу барањата на угостителите за организирање веселби и проширување на капацитетите на работа, министерот одговори:

„Многу е веројатно тоа да се случи, ако продолжат овие трендови односно, ако бројките и понатаму се намалуваат, како што се намалуваа досега. Во делот на барањата на угостителските објекти можно е да се дозволат свадбите после долг период, со протоколи во однос на потполнетост на капацитет само во надворешни услови, не и внатре и евентуално да се зголеми бројот на посетители по маса“.

Донесените мерки, во однос на полицискиот час, носењето маски и слично остануваат да важат до 1 јуни, а продолжува и препораката за карантин од 14 дена за сите патници кои доаѓаат од Африка, Индија, Јужна Америка.