Шабани: Наставниците сами треба да се пријават за вакцина, ние не можеме да ги натераме

Се поизвесно е дека новата учебна година од септември ќе стартува со физичко присуство. Вакцини против коронавирус до сега прими само дел од просветниот кадар кои и во пандемската 2020/2021 држеа часови во училиштата, поради што и беа ставени на приоритетната листа за имунизација. Вакцинацијата не е задолжителна, па опфатот на вакцинирани наставници зависи од самите нив, како и од снабденоста на Министерството за здравство со вакцини, рече при денешната посета заменик министерот за образование Арафат Шабани и ги повика просветните работници да се пријават за вакцинација.

„Ние како МОН најпрво доставивме приоритети за наставниците од 1 до 3 одделние кои држеа настава со физичко присуство. Сега колку наставници ќе се вакцинираат зависи од Министерството за здравство, колку е снабдено со вакцини и од свеста на самите наставниците. Ние не можеме да го натераме, тие треба сами да се пријават. Значи ние како Министерство може само да дадеме поттик и насока, а наставниците треба да се свесни и да се пријават. Очекувам до почетокот на новата учебна година, односно до 1 септември оние кои се пријавиле да добијат вакцина.“, кажа Шабани.

Заменик министерот додаде дека за сега сите показатели се дека учениците ќе се вратат во клупите во новата учебна година.