Лукаревска: Преку Мој ДДВ до сега на граѓаните им се исплатени 36,3 милиони евра

Апликацијата Мој ДДВ, преку која граѓаните скенираат фискални сметки за поврат на дел од парите од данокот има над 399 илјади корисници, а од почетоктот на имплементацијата до сега исплатени 2 238 340 844 денари, односно 36,3 милиони евра, истакна денес директорката на Управата за јавни приходи Сања Лукаревска на прес конференција посветена на две години од стартот на проектот МојДДВ.
,, Се потврди дека мерката ги оправдува целите за коишто е воведена. Ги враќа парите назад кај граѓаните и придонесува за намалување на сивата економија. Под мотото ,,Мој Данок, Моја заштеда” , секој граѓанин ја согледа и важната улога и одговорност којашто ја има во овој процес – а тоа е активно да учествува во намалувањето на неиздавањето на фискалните сметки со тоа што како партнер на УЈП, ги пријавува ваквите појави. Благодарение на оваа мерка, едно четиричлено семејство може да врати до 28.000 денари годишно во семејниот буџет. Во првата година преку МојДДВ, вратени се над 670 милиони денари, додека во втората година од Мој ДДВ вратени се над 1,5 милијарди денари. Во оваа 2021 година за првото тримесечје на граѓаните им се исплатени 413.758.172 денари.“, рече директорката.

Лукаревска посочи дека опцијата за донирање на парите во здравствениот сектор ја искористиле 5.537 граѓани, во износ од 5,8 милиони денари.