Алармантна состојба со пожарите, се појавуваат нови жаришта

Состојбата со пожарите во земјава е алармантна. Високите температури и силниот ветер  го отежнуваат гасењето. За само неполн час пријавени се нови седум пожари, информираа  на прес-конференција од Центарот за управување со кризи.

„Состојбата се менува од минута во минута, а исклучително сувата вегетација, високите температури и ветерот кој дуваше на целата територија на државата придонесоа за брзо ширење на постоечките пожари и појава на нови жаришта“, рече директорот на ЦУК, Стојанче Ангелов.

Најризично е во Делчевско – Пехчевскиот регион, во селото Нов Истевник зафатени се 3 куќи и три плевни, гасењето е отежнато. Во тој дел интервенирале 4 хеликоптери, 200 војници од АРМ, ресурси од јавните претпријатија, противпожарни бригади и ресурси кои пристигнале како помош од Бугарија. Загрозени се и селата Робово, Умлена и Чифлик.

Во Скопје активни се 18 пожари од кои три се најкритични, во Кучково кон Горно Свиларе, меѓу Добри Дол и Ракотинци во Сопиште, и во Горно Блаце. Големи пожари беснеат и во кумановскиот регион.