Бесплатно летно училиште во Гостивар за деца по јазици, компјутери, уметност, спорт

Во летниот период за децата на возраст од 7 до 14 години во Гостивар ќе биде организирано летно училиште, со курсеви по јазици, уметност, компјутери, музика, спортски активности и др. Проектот е на Општина Гостивар и ќе се спроведува во соработка со основните училишта. За таа цел денес се одржа информативна средба меѓу Секторот за образование и школските управи.

„Летното училиште ќе трае од 1 јули до 15 август и секое дете може да одбере две активности, два курса во кои ќе се вклучи. Сметаме дека ова многу ќе им помогне на децата и во знаења и вештини, но и за меѓусебно дружење. Сите активности ќе се спроведуваат во работни денови, од понеделник до петок и ќе преферираме да ги организираме на отворен простор или евентуално во училници.“, појасни раководителката на Секторот, Аслијан Снопче.

Заинтересираните ученици може да добијат подетални информации и да се пријават за курсевите во своите училишта.