Бејта: Таравари не е способен, говори невистини, деградира административци и нема сработено ништо

“Наместо да ја реализира својата програма што ја вети, Таравари уценува и ги понижува моите соработници, мојата партија и моите граѓани. Спроведува политички реваншизам, вработува партиски војници во јавните претпријатија и во администрацијата, а од друга страна 15 административци кои успешно работеле ги премесети во друга зграда со несоодветни простории и никакви услови“, изјави денес поранешниот градоначалник на Гостивар, Невзат Бејта на прес конференцијата што ја одржа по повод 100 дена владеење на новиот градоначалник.

Бејта оцени дека досегашното работење на Таравари е неуспешно и проследено со незаконитости: „За кратко време во јавните претпријатија и адмнистрацијата има вработено над 100 партиски војници кои нема каде да седат и не работат ништо. А сите тие се плаќаат од пари на граѓаните. Тој нема способности, не знае да менаџира, не беше способен како министер, не е ни сега како градоначалник. Ако зборува да има нови избори во Гостивар, нема тоа да бидат избори за советници, туку може да има избори за нов градоначалник“

Во однос на обвинувањата во кампањата на Таравари „Вистината за ДУИ“ , Бејта коментира дека сите изнесени тврдења се лаги:

„Кажува невистини за моето работење и за огранокот на ДУИ во Гостивар. Од тоа што го кажува, не е точно ништо. Ако сум грешел нека поднесе пријави до јавно обвинителство и јас ќе одговарам пред ограните на правда. Тие документи се јавни, ние сме биле транспарентни, а сите процедури биле како што е предвидено со Закон. Продажбата на земјиштето, се прави во соработка со Министертво за транспорт и врски и земјиштето е доделено на инвеститори кои донеле милиони во интерес на Гостивар и платиле комуналии, кои пари ние сме ги инвестирале во проекти“.

Бејта посочи и дека актуелниот градоначалник како министер за здравство исплаќал пари на фирми блиски до високи партиски функционери на ВМРО ДПМНЕ, со што како што рече, си ја обезбедил победата на локалните избори во Гостивар.

На прес конференцијата беа презентирани и предизборните ветувања на Таравари, од кои како што беше речено, ниту едно не реализирал.