Голем пожар на територијата на НП Маврово, екипи интеревенираат на терен

Гори поголема површина сува трева и пасишта на територијата на Националниот Парк Маврово. Информацијата за  Gostivarpress.mk ја потврди директорот на НП Маврово, Самир Ајдини, кој информираше дека екипи од претпријатието интервенираат на гаснење на огнот и дел од пожарот е локализиран.

„Зафатен е делот меѓу Луково Поле и горната Полициска станица, на местото Беланџа. Се работи за поголема површина. Екипи на нашето претпријатие се на терен и огнот во околината на полициската станица е локализиран. Тие ќе продолжат со активности за гаснење и верувам дека ќе успеат да се справат целосно со пожарот, како што било и до сега во вакви ситуации, иако теренот е тежок со  непристапни предели.“, рече Ајдини.

Центарот за управување со кризи информираше дека, освен вработени од НП Маврово, во гаснењето на пожарот се вклучени и полициски службеници ПС Стрезимир.