Дебатниот клуб од економското училиште во Гостивар со поддршка на кампањата против насилство врз жените

Поттикнати од актуелната светска кампања Шеснаесет дена борба против насилство врз жената, дебатниот клуб при Средното економско училиште во Гостивар,  под менторство на професорката Габриела Петроска, организираа настан на тема „Да биле потпетиците добри, мажите се` уште би ги носеле”.

На дебатата се зборуваше за рамноправноста меѓу половите и семејното насилство во кое најчесто жртви се жените.

„Економската зависност од мажот, традицијата, општествените норми, образованието и други слични појави се главните причини кои ја сведуваат жената на ниво на жртва. Бројките од анкетите кои укажуваат на фактот дека секоја втора жена во земјава трпи психичко насилство се навистина аларматни. За оваа проблематика мора отворено и почесто да се зборува, затоа и ми причинува задоволство што учениците на ваков начин се приклучија кон кампањата.“, рече Себајете Зенку, м-р по родова еднаквост, која беше говорник на дебатата.

Средношколците своите ставови и мислења на темата ги искажаа и преку куса драмска изведба и порачаа дека не треба да се остане на зборови, туку да се преземат конкретни чекори за надминување на проблемите.