Дечиња од Гостивар другаруваа, се едуцираа и порачаа: Разликите не‘ зближуваат!

Дваесетина основци од гостиварските училишта од различни националности и верска припадност имаа можност три дена 20-23 јуни) низ различни активности, да другаруваат и да учат за карактеристиките на Гостивар и регионот, со цел што подобро да се запознаат меѓусебе и да градат почит и разбирање.

Во рамки на проектот насловен „Разликите не‘ зближуваат“ на децата им беа презентирани фотографии од стар Гостивар, ги посетија Беговата куќа, куќата на Ахмет Чако, се искачија на Саат Кулата, а заедно беа и во црква и џамија. Исто така, дечињата го посетија Националниот парк Маврово, ја изодеа патеката на Петко и од планинарски водичи се информираа околу ендемичните видови на растенија и животни кои живеат во овој крај. За учесниците беше организирана и работилница на која професорката Елизабета Наумческа ги запозна со нови техники на цртање, а изработените слики беа презентирани на изложба.

„Целта на проектот беше децата да се запознаат меѓусебе, да се дружат, да научат нешто повеќе за Гостивар и регионот што ќе им помогне за градење почит и разбирање. Нашата порака е дека доколу повеќе се запознаваме меѓусебе, повеќе ќе се почитуваме. Во текот на целата дружба децата учеа и пишуваа зборови на сите четири јазици кои се зборуваат во Гостивар.“, велат од Здружението за култура, спорт и образование „Анисија“, организатори на проектот, кој се реализираше со поддршка на Општина Гостивар.

На децата учесници на крај им беа доделени сертификати.