Ден на планетата Земја – помалку пластика, почиста околина

Ширум светот денес се одбележува 22-ри Април, Денот на планетата Земја. Годинава акцентот е ставен на борбата против пластичниот отпад.

Денот на планетата Земја прв пат бил одбележан на 22-ри Април 1970-та година во САД. Денес го одбележуваат повеќе од 175 држави низ целиот свет. Целта е да се подигне свеста кај луѓето за зачувување на животната средина, да укаже на загадувањето на воздухот и водата, радиоактивното зрачење, исцрпувањето на ненадоместливите енергенси и слично.

Според анализите на меѓународен истражувачки тим, во Азија до 2048 нема да има повеќе риба за комерцијален риболов, а Африка може да изгуби половина од некои видови птици и цицачи до 2100 година. Повеќе од една четвртина од видовите што живеат само во Европа се загрозени и им се заканува истребување.

Податоците пак од истражувачка организација Global Footprint Network покажаа дека речиси половина година, луѓето на планетата Земја живеат„на кредит“, бидејќи веќе ги потрошиле ресурсите кои планетата би можела да ги регенерира на годишно ниво.