Младите гостиварци во акција за чист воздух

Младите гостиварци денес на градскиот плоштад ги информираа граѓаните на тема загаденост на воздухот и од нив бараа мислења, какви мерки треба да се преземат за да дишеме почист воздух.

„Воздухот во Македонија понекогаш видно е загаден, особено во Гостивар. Има многу фактори кои придонесуваат во загадувањето, повеќето од кои се поврзани со нашиот начин на живот и изборот што го правиме“, велат младите. Со оваа активност тие сакаат да испратат порака дека секој поединец може да даде свој придонес во намалување на загаденоста.

„Сакаме да им покажеме на граѓаните дека има начини како сите може да придонесат за чист воздух. Не мора да значи дека воздухот го загадуваат само големите фабрики, туку и сите луѓе со несовесно однесување. Но, исто така, сите може да придонесеме за воздухот што го дишеме, да биде почист“, изјави Иво Дамјановски, од YMLP Club Гостивар, организатори на активноста.

Да се намали употребата на дрва како огрев, помалку да се користат автомобилите, да се поставуваат соодветни филтри на загадувачите – беа дел од предлозите кои граѓаните ги споделија на поставената инфо-табла.

Настанот беше збогатен со музика и други забавни активности, а се одржа со поддршка на општина Гостивар.