Десет лекари од болницата во Гостивар заминуваат на специјализација, на нивно место ќе се примат нови

Поради пандемијата со коронавирусот, минатата година немаше конкурси за специјализации на млади лекари. Повеќето болнички одделенија функционираа како ковид центри, а медицинскиот персонал беше ангажиран во третманот на пациентите болни од ковид. Годинава, во Програмата за специјалистички и супспецијалистички кадри која беше усвоена од Владата во јуни одобрени се 498 специјализации и 87 супспецијализации.

Според најавите, од гостиварската болница „Д-р Ферид Мурад“  на специјализација ќе заминат десетина млади лекари, а на нивно место ќе бидат примени нови кадри.

„Плановите на болницата беа секоја година на специјализација да се испраќаат по 10 до 12 лекари, според потребите и анализата како ќе оди текот на пензионирање на специјалистите. Пандемијата лани ги закочи овие планови. Сега веќе добивме насоки да ги почнеме постапките и веќе ги правиме сите тие процедури кои се потребни за специјализациите, како и за нови вработувања. Десет доктори праќаме на специјализација, што значи мора да примиме десет други, за да ги заменат. Нови вработувања се предвидени и на немедицински персонал, затоа што не сме примале подолго време, а дел од кадарот се пензионира. Ние како болница секако имаме потреба и од немедицински кадар. Верувам дека сите овие процедури ќе се завршта до крајот на месецов“, изјави директорот на општата болница во Гостивар, Јакуп Јакупи.