Доколку треба да се следи сомнителен случај на корона на инфективно во Гостивар, останатите пациенти ќе се пренасочуваат

На инфективното одделение во гостиварската болница, опремена е посебна просторија за изолација на евентуални пациенти сомнителни на коронавирус. Во просторијата има три болнички кревети, заштитни маски, очила, ракавици, капи и мантили за една употреба, како и средства за дезинфекција.

Инфективното во Гостивар е едно од трите одделенија во земјава, покрај во Штип и Велес за кои министерот за здравство Венко Филипче вчера информираше дека се определени за опсервирање и следење на сомнителни случаи, ако се јави потреба.

Директорот на болницата во Гостивар, Јакуп Јакупи рече дека ја опремиле просторијата според препораките на Министерството, а обезбедиле и посебно амбулантно возило за транспорт на евентуални заболени.

„По препораките на Министерството за здравство ги презедовме сите неопходни мерки. Направивме изолација на една просторија на инфективното одделение, го снабдивме одделението со поголем број на стерилни маски, капи, мантили. Неодамна се снабдивме со уште едно амбулантно возило, кое е подготвено по потреба да се стави на располагање. Има и доволно количини на потребните средства за дезинфекција и за одделението, за персоналот, возилото. Се надеваме дека нема да има случаи со коронавирус, но ние сме подготвени и ги презедовме сите мерки“, изјави д-р Јакуп Јакупи, директор на општата болница во Гостивар

Јакупи вели дека доколку дојде до згрижување на пациент сомнителен на коронавирус, тогаш инфективното одделение ќе се затвори за останатите пациенти, односно тие ќе се пренасочат на другите одделенија.

Во земјава до сега не е регистриран случај на заболен од коронавирус. Здравствените власти ги зајакнаа мерките на превенција и формираа Кризен штаб во рамките на Министерството. На граѓаните им препорачуваат да ги следат општите мерки на заштита, како одржување на лична хигиена, поголема внимателност при подготвување на храната и слично.

Инаку, во Гостивар деновиве има зголемен број на граѓани со грип. На инфективното одделение во изминатите 24 часа, лекарска помош побарале стотина пациенти.