ДУИ: Таравари прави нов скандал – избра туристичка агенција за чистење на снегот

Огранокот на ДУИ во Гостивар излезе со реакција за јавната набавка на општината за зимско одржување на патиштата. Од таму нагласуваат дека е направен скандал и тендерот во вредност од 5 милиони денари го добила туристичка агенција.

„Таравари на овој начин ги игнорира фирмите кои вложиле пари за да набават механизација каква што се бара за чистење на снегот. Скандалот е уште поголем ако се знае дека истата туристичка агенција, Насир Турс го доби и тендерот за превоз на ученици. Јавно го молиме Таравари да одговори како чистењето на снегот е доделено на фирмата за која сите жители на Гостивар знаат дека не се занимаваат со оваа дејност. Сите граѓани знаат дека оваа компанија се занимава со превоз на патници, а не со чистење на снег. Дали на Таравари му е јасно дека чистењето на снегот се врши со специјални возила за таа намена, а не со автобуси во сопственост на туристичка агенција“, стои во соопштението од ДУИ.

На ваквите обвинувања градоначалникот одговори дека при тендерот за зимско одржување биле запазени сите законски процедури, а фирмата која е избрана дала најповолна понуда со која трошоците за чистење на снегот значително ќе се намалат.