Екологистите од економското училиште меѓу најдобрите на конкурсот за млади репортери

Новинарската сторија на Еко одборот на средното економско училиште во Гостивар освои второ место на националниот конкурс „Млади репортери за животната средина“ . Конкурсот беше организиран во рамки на проектот „Интеграција на еколошката едукација во македонскиот образовен систем“, кој во училиштата се спроведува со поддршка на Министерството за образование.

Новинарската сторија на екологистите од гостиварското економско училиште се однесуваше на загадувањето на воздухот од автомобилите. Посочувајќи на големиот број возила кои секојдневно се движат во градот, учениците дадоа свој предлог Гостивар да има свој „ден на велосипеди“ во кој граѓаните ќе ги заменат автомобилите со велосипеди.

Во изработка на сторијата учествуваа ученичките: Марија Петроска, Емилија Србиноска, Емилија Данилоска под менторство на професорката Рада Илиевска.

Во дел од сторијата се вели: „Едно гостиварско семејство поседува просечно по два автомобила, а скоро секое семејство за својата младина наместо здрав живот со велосипед, избира загаден воздух со мотор. Возењето автомобил овозможува брзо и лесно стигнување до посакуваното место, но истовремено врши и огромно загадување на воздухот. Зошто сето ова да не се измени и користењето на велосипед во Гостивар да стане секојдневие?“