ФК Гостивар во финишот испушти победа против Шкендија 2-2

Викендов се одигра 9. коло од Првата македонска фудбалска лига во кое екипата на ФК Гостивар беше домаќин на тетовска Шкендија, натпреварот заврши без победник 2-2.

Гостиварци брзо стигнаа до водство со погодокот на Атиемвен во 12. минута, а израмни Енур Тотре од пенал во 24. минута. Домаќините играат се подобро како одминува сезоната и ја имаа иницијативата во поголемиот дел од натпреварот, наградата дојде во 45. минута кога Алпер Потук повторно ја доведе во водство екипата на Гостивар.

Во вториот дел Шкендија се обидуваше да дојде до израмнување, но не успеаа да ја затресат мрежата се до самиот крај на натпреварот, кога во 90. минута албанскиот интернационалец Цаке, го постигна израмнувачкиот гол. Гостиварци имаа голема шанса за победа во судиското надополнување кога голманот на Шкендија, Талевски им подари една топка во шестнаесетникот, но на среќа на тетовчани, ударот беше изблокиран. Резултатот остана непроменет и натпреварот заврши со конечни 2-2.

Во преостанатите натпревари Работнички го совлада Тиквеш, Силекс триумфираше над Воска, Шкупи славеше над Струга Трим Лум.

ПМФЛ – 9 коло:

Брегалница – Вардар 0-0
Гостивар – Шкендија 2-2
Работнички – Тиквеш 1-0
Шкупи – Струга 2-0
Силекс – Воска 4-2
Македонија ЃП – Брера Струмица 1-0

Табела: Шкупи 18, Шкендија 17, Силекс 16, Струга 15, Брера Струмица 14, Тиквеш 13, Работнички 13, Македонија ЃП 11, Брегалница 10, Воска 7, Гостивар 7, Вардар 5.