Гостивар е познат по…

Кои се првите работи кои ви доаѓаат на памет врзани со традициите, обичаите, храната, објектите и слично кои се препознатливи белези на Гостивар? За гостопримството не треба да стане ни збор, затоа што градот го добил името токму поради гостопримливиот народ кој и во старо време знаел да им угоди и добро да ги пречека сите гости 🙂

Гостивар е познат по баклавата. Кој еднаш пробал парче гостиварска баклава, секогаш ќе навраќа за повеќе. Традиционалната гостиварска баклава си има свој мајсторлук и не е нешто што може секој да го стокми како што треба. Корите се сучат рачно со сукало и треба да бидат многу тенки, проѕирни, филот е со ореви, а одозгоре се ставаат ф`стаци. И секако, шербетот мора да биде погоден, за вистинскиот шмек на ова мало благо задоволство.

Гостивар е познат по изворите на Вардар. Нашиот град е прв град на Вардар, најголемата река во Македонија. Ако немате идеја каде да ги прошетате гостите дојдени од друго место, изворите се добар избор. Таму максимално се ужива во природата и глетката на создавање на реката Вардар.

Гостивар е познат по Беговата Куќа и Саат Кулата. Беговата Куќа е објект од културно-историското минато на градот кој датира од 18 век. Пример на автентична, староградска архитектура, заштитена во 1984 година како културно наследство. Саат Кулата, исто така споменик на културата, е симболот на градот.

Гостивар е познат по бањичкиот кромид. Ако Тетово го има гравот, Охрид  – црешите, Струмица – пиперките, Гостивар го има бањичкиот кромид. Црвен, благ и карактеристичен по вкус, многу баран на пазарите.

Да не ги заборавиме и: неодоливиот бурек, направен од вештите раце на гостиварските мајстори, успешните спортисти, „бесните“ автомобили и скапите свадби – особено налето, убавите гостиварки… Има уште нели?