Гостивар ноќеска потона во мрак: Јавното осветлување исклучено, општината вели долгот е платен

Граѓаните на Гостивар вчеравечер беа непријатно изненадени, кога градот потона во целосен мрак. Светилките од јавното осветлување не се уклучија во вообичаеното време и на улиците владееше тотална темница.

Од ЕВН информираа дека јавното осветлување, како и зградата на општината и неколку објекти под надлежност на општината, биле исклучени поради неплатен долг.

„Општина Гостивар не е корисник на ЕВН Електроснабдување, туку ги користи услугите на друг снабдувач. Вчера се исклучени зградата на општината, градското осветлување и неколку објекти под надлежност на општината поради неплатен долг. Исклучувањето според процедурите се прави по барање на снабдувачот кон Оператирот на дистрибутивниот систем, односно Електродистрибуција.“, соопшти Електродистрибуција.

Градоначалникот Арбен Таравари во изјава за Gostivarpress.mk рече дека општината имала долг за електрична енергија за два месеци, но дека истиот бил платен вчера.

„Долгот за два месеци го подмиривме вчера и сега не должиме ништо за електрична енергија. Не знам зошто беше исклучено јавното осветлување, можеби парите не биле поминати и легнати на сметка се‘ уште. Инаку, општинската зграда, или други институција под наша надлежност не биле исклучени од струја. Само осветлувањето. Верувам дека вечерва ќе нема таков проблем, со оглед дека се‘ е платено.“, рече градоначалникот.

Таравари потенцира дека сметките за јавно осветлување се драстично зголемени, и од 10-15.000 евра месечно сега општијата ја чинат 60-70.000 евра.