Гостивар во спомен на 8 децении од смртта на херојот Злате Малаковски и Февруарскиот поход

Со собир и положување на цвеќе во Гостивар денес беа одбележани 80 години од смртта на народниот херој Злате Малаковски и борбените операции од НОВ познати како Февруарски поход.

Одбележувањето традиционално беше организирано од општинската организација на Сојузот на борци од Гостивар, а присуствуваа нејзини членови, граѓани, основци од „Единство“ и „Гоце Делчев“, како и претставници на политичките партии.

„Оддаваме почит на славниот бестрашен пушкомитралезец од првиот баталјон на Првата македонско-косовска ударна бригада, кој за народен херој е прогласен на 8-ми октомври 1953 година. Зачувувањето на споменот за Злате не е само цивилизациска потреба, тоа пред се‘ е потреба на сегашните и идни генерации да се поттикнуваат да ги сочуваат неговите вредности и врз нив да создаваат нови, уште посилни. Само така, жртвата и борбата на Злате ќе има своја смисла и оправдување. Нека денешното одбележување биде наша благодарност и почит на оние кои се бореа и ја изборија слободата на Македонија“, истакна Радислав Ѓиноски, претседател на гостиварската боречка организација.

За важноста и историските моменти од Февруарскиот поход, на собирот преку реферат потсети, професорката по историја Катица Аврамоска.

„Февруарскиот поход буди најдлабоки емоции и овој февруари. Револуционерната традиција создадена низ вековниот отпор, остави длабоки траги во макотрпната историја на македонскиот народ. Таква е трагата на датумот на Февруарскиот поход, кој е длабокот втемелен во историското паметење на нашиот народ. Февруарскиот поход никогаш не умрел, останал наш фаќел на непресушните извори на револуцијата.“, подвлече Аврамоска.

По собирот, пред споменикот на паднатите борци од НОВ во градскиот парк беше положено цвеќе. Букети положија делегации на Сојузот на броци и на локалните ограноци на партиите СДСМ и ВМРО-ДПМНЕ.

За време на Февруарскиот поход во 1944 година Првата македонско-косовска бригада тргнала од Егејска Македонија со задача да се пробие во Азот и Порече и да се разгори вооружената борба во тој дел на Македонија. На тој пат во реонот на Азот и Мариово бригадата ја попречиле силни бугарски окупаторски сили со кои водела повеќедневни и деноноќни борби во опкружување, бригадата била принудена да се врати во Егејска Македонија. Во состав на бригадата се бореле 40-тина борци од регион на Гостивар, а загинале гостиварците: Васил Василески, Борче Јованоски и Крсте Ѓиноски, вруточанецот: Слободан Пепоски, беличанецот: Светозар Спироски, ниќифорецот: Денко Дејаноски и богдевецот: Злате Малакоски. Учесник во Февруарскиот поход бил и народниот херој Чеде Филипоски-Даме.

Малаковски во прилепско бил предводник на борбата против бугарските војници со уште петмина доброволци. Бугарските војници ги блокирале сите излези од градот и кај фудбалското игралиште ја опколиле групата. Злате и останатите доброволци загинале во борбата.

Сојузот на борци Гостивар месецов беше во Прилеп на заедничко чествување со тамошната боречка организација во спомен на 80 години од загинувањето на народниот херој Малаковски.