„Пациенти“ во Гостивар, урнебесна комедија за брачните „војни“

Гостиварската публика добива можност да се опушти и да се изнасмее со хит-комедијата „Пациенти“ на Театарот Провокација.

„Тој – хроничен алкохоличар, таа – хистерична аждаја. Не знаеш кој заради кого го сменил својот облик на битисување. Ова е претстава за односите во бракот, за тоа како изгледа заедничкото живеење на партнерите кои го негуваат егото наместо љубовта, во кое е присутна војната наместо спокојот. Ова е претстава која е огледало на ситуациите од нашите животи. Ова се ситуации во кој ќе се препознаеме сите ние и нашите најблиски во моментите кога си дозволуваме да се разгорат оние „дебати“ во кои не ги бираме зборовите и средствата, само за да излеземе во право, во кои целиме што повеќе да повредиме бидејќи се чувствуваме повредено. Дополнителен квалитет е тоа што брачната актерска двојка Мирјана и Роберт Ристов, несебично го внесува и своето емпириско искуство, со цел огледалото да стане што појасно и пореално. Улогата на Доктор Доце му е доделена на младиот и талентиран актер Радо Алесовски.“, стои во описот за комедијата, која е во режија на Ѓорѓи Ризески.

Изведбата на „Пациенти“ во Гостивар е закажана за 29-ти февруари (четврток), во Центарот за култура АСНОМ со почеток во 20 часот.