Гостиварка покрена кампања за поддршка на децата со посебни потреби – „Да создадеме свет без граници“

Под мотото „Да создадеме свет без граници“ во земјава започнува кампања насочена кон децата со посебни потреби и нивните семејства. Целта е да се сврти вниманието на јавноста, особено на политичките чинители, за бројните тешкотии и предизвици со кои се соочуваат овие деца и нивните родители и да им се пружи неопходната поддршка, барем малку да им се олесни секојдневието.

Кампањата ја покрена гостиварката Маргарита Милошеска, и самата мајка на девојче со церебрална парализа. Поддршка на активностите даваат неколку здруженија, кои делуваат во оваа област.

„Ги повикуваме претседателите на сите политички партии на 8-ми јули, во 5 минути до 12 часот во Жена парк, спроти Собранието да го потпишат документот со кој ќе се обврзат да го поддржат исполнувањето на нашите барања. Не ни требаат празни ветувања, туку потпис дека ќе се заложат за решавање на нашите проблеми. Сега преку оваа кампања ги повикуваме јавно да дојдат и да го дадат својот потпис, а до секој од нив деновиве ќе испратиме и лична покана.“, вели Милошеска.

Едни од барањата во документот се: позначително покачување на посебниот додаток, тргнување на возрасната граница од 26 години за остварување одредени права, како и право на пензионирање на родителите на деца со посебни потреби на 55 години.

„Оваа кампања е за децата кои не учат на безусловна љубов  – Да создадеме свет без граници“, порачува Маргарита.