Гостиварската болница се освежува со нов кадар

Општата болница „Ферид Мурад“ во Гостивар вработува нов медицински персонал. Во тек се огласи за прием на доктори по медицина, рендгенолози, физиотерапевт, физиотерапевтски техничар, лаборанти, акушери, фармацевстки техничар. Како што е наведено во огласите, сите вработувања се на неопределено време, а основните месечни плати се движат од 16 до 25 илјади денари.

Основната плата, на пример за Акушер со работно време од 40 часа неделно изнесува 16.000 денари, за акушер-специјалист 22.500, додека за доктор по медицина предвидена е основна плата од 25.000 денари.

Гостиварската болница години наназад се соочува со недостиг на кадар. Повеќе лекари, специјалисти, медицински сестри се потребни речиси во сите болнички одделенија и амбуланти, ако се има предвид дека установата покрива регион со над 100 илјади граѓани од општина Гостивар и околните Врапчиште и Маврово Ростуше.