Хронично болните лековите може да ги добијат без да одат кај матичните лекари

Фондот за здравствено осигурување од први мај воведе пропишување и издавање на лекови без хартија, преку електронски рецепт, еРецепт за хронична терапија за хронично болни лица.

Практично, ова значи дека нема потреба хроничните болни да одат кај матичен лекар за да им биде препишан и издаден хартиен рецепт. „Наместо да губат време за одење, чекање во ординации и враќање,корисниците на хроничната терапија ќе треба телефонски да исконтактираат со својот матичен лекар и да добијат информација дека им е искреиран електронскиот рецепт. Потоа одат директно во аптека и содокумент за лична идентификација ќе можат да ги подигнат пропишаните лекови.“, објаснуваат од ФЗО.

Предвидена е можност, друга личност да ја подигне терапијата во нивно име, доколку хроничните пациенти не можат лично да го сторат тоа.Освен како мерка за поефикасна заштита на пациентите и медицинскиот персонал од актуелниот корона-вирус, електронскиот рецепт ќе продолжи да функционира и по завршувањето на пандемијата со ковид 19. Од први мај функционира за хроничните пацинети, а се предвидува понатаму да профункционира за сите осигуреници и за сите дијагнози.

„Придобивките од новиот електронски рецепт се повеќекратни за сите осигуреници, матичните лекари, аптекарите како и за Фондот за здравствено осигурување. Хроничните болни добиваат лесен и ефикасен пристап до лекови и поефикасна здравствена заштита. Матичните лекари нема повеќе да изготвуваат хартиени рецепти туку нивниот софтверски креиран рецепт ќебиде достапен директно во аптеките. Се скратуваат трошоците и ресурсите за принтање и издавање на рецепти, а лекарите ќе имаат многу повеќе време за прегледи на пациентите без никаков дополнителен трошок.“, соопшти ФЗО.