Кога ќе се отворат детските градинки? – Се изработуваат план и протоколи

Кога повторно градинките ќе ги отворат вратите за згрижување на деца? Ова прашање ги засега голем дел од родителите, коишто од различни причини не можат да најдат друга алтертатива за чување на децата. Министерот за здравство, Венко Филипче, на денешната прес конференција соопшти дека Комисијата за заразни болести разговарала на оваа тема и дека се разгледува како да се организира работата на градинките, со оглед дека за нив треба да има посебен протокол.

„Сè уште траат консултациите за што ќе стапиме во контакт со самите градинки за да се изработи посебен протокол. Свесни сме дека навистина е тешко и тоа е голем предизвик, затоа што децата нормално дека се во ризик да бидат трансмисија на болеста. Многу тешко во градинките може да се одржуваат правилата. Сакаме да донесеме план кој ќе може да се спроведе. Градинките мора да бидат во функција кога сите ќе се вратат на работа, така што, дозволете, во наредните денови, кога ќе биде готов планот, да дадеме повеќе информации како и на кој начин градинките ќе почнат да работат“, рече министерот.

Детските градинки и училиштата во земјава се затворени од 10 март. За да им се излезе во пресрет на родителите, се донесе мерка која овозможува еден од родителите на дете до 10 годишна возраст да е ослободен од работа. Мерката важи и за самохраните родители.