Иницијатива за 7 часа работно време и прогласување на 2 јануари и 2 мај за неработени денови

Синдикатот на работниците од управата, правосудните органи и здруженија на граѓани на РМ (УПОЗ), покрена иницијативата за промена на работното време и измена на Законот за празниците. Синдикатот предлага воведување на 7 часовно работно време, по примерот на земји членки на Европската Унија, како што се Франција, Данска, Италија, Холандија, Ирска, Белгија.

Претседателот на УПОЗ Пецо Грујовски смета дека воведувањето на работното време од 7 часа на ден ќе донесе неколку бенефиции.

,,Седумчасовното работно време ќе овозможи намалување на невработеноста затоа што се врши подобра распределба на трудот, односно има голем број вработени кои работат подолго од 8 часовното работно време, а од друга страна голем број на граѓани се невработени. Со намалување на работното време за 10,2% од секој работник, теоретски, ќе доведе до потреба работодавачите да ангажиаат дополнителен број на работници со што би се намалила и невработеноста. И од економски аспект има бенефит затоа што во услови на неорганизирана исхрана во органите на државната управа поскап е пладневниот оброк на вработените, а исто така зголемена е потрошувачката на топлинска и електрична енергија. Од социјален  аспект, пак, ќе се зголемат можностите за грижа кон семејството, за  релаксација и рекреација. Во недостаток на целодневна настава на децата-ученици  отежнато е нивното згрижување и семејно воспитување, што е спротивно со заложбите и политиките за  подобрување и зачувување на семејните вредности, а од биолошки аспект – работното време особено во попладневниот период не покажува особена креативност и продуктивност.”,вели Грујовски.

Со измена на оваа одредба во Законот за работни односи би се утврдил 7 часовен работен ден, односно 35 часовна работна недела. Со сегашното решение во Законот за работните односи е предвидено дека полното работно време не смее да биде подолго од 40 часа неделно, а работната недела по правило трае 5 работни дена. Во однос на иницијативата за измена на Законот за празници, УПОЗ бара 2-ри јануари и 2-ри мај да бидат прогласени за неработни денови.

Иницијативата за прогласување на 2-ри јануари и 2-ри мај за неработни денови, како и за воведување на седумчасовен работен ден, Синдикатот на работниците од управата, правосудните органи и здруженија на граѓани на (УПОЗ) ја поднесе до Владата на Република Македонија и Министерството за труд и социјална политика.