Изложба на декорирани јајца во ОУ „Гоце Делчев“ – креативноста на децата нема граници

Јајца декорирани како бубамари, зајчиња, цветови, пилиња, мињони и многу други креативни идеи беа дел од изложбата што се одржа утрово во холот на основното училиште „Гоце Делчев“ во Гостивар. Овој настан е традиција што се негува во училиштето секоја година во пресрет на велигденските празнувања. Бојадисаните јајца учениците ги украсуваат користејќи најразлични техники и материјали, а од она што можеше да се види, се потврди дека креативноста на децата нема граници.

„Во нашето училиште секоја година се одржува манифестација за декорирани јајца која ја води нашиот наставник по ликовно, Ратко Богданоски, а голема помош за организирањето имавме и од директорот Сашо Шарески“, рече Кристина Ѓорѓеска, ученичка во деветто одделение.

„Ова е многу убава можност учениците да ја покажат својата креативност. Особено не радува што годинава масовно се вклучија и нижите одделенија.“, нагласи Александра Наумческа, одделенски наставник.

Настанот има и хуманитарен карактер, јајцата ќе се донираат преку Црвениот Крст за помош на социјално загрозени семејства.

Учениците и одделенијата кои имаа најоригинални декорации добија пофалници и пригодни подароци.