Редок јубилеј! Киро Кипроски одбележа 55 години новинарство и промовираше нова книга

Во божествениот амбиент со духовно смирувачка енергија на Бигорскиот Манастир, доајенот на македонското новинарство и публицистика од Гостивар Киро Кипроски, денес го прослави јубилејот – 55 години творење и работа. Уште поголемо значење на реткиот јубилеј му даде промоцијата на неговото најново дело, монографијата „Духовните светилишта на гостиварското архијерејско намесништво“.

Публиката дојдена од сите страни на Македонија, во првиот дел од настанот имаше можност да се потсети на богатата новинарска кариера на Кипроски преку портретот што за оваа прилика го напиша Панде Колемишевски, поранешен генерален директор на НИП „Нова Македонија“ и главен и одговорен уредник на весникот, а пред присутните го прочита сестра Ефимија.

„Киро Кипроски во себе носи многу новинарски лица насликани со неверојатни бои што создаваат повеќе портрети, колку истовремени, толку и различни. Кипроски како радио новинар, како известувач од дневни настани, како врвен пишувач на репортажи, како патеписец, како творец на портрети на други лица, како новинар патник страдалник, како пример за ентузијазам и посветеност на она што го избрал како професија. Значи не е лесно да се направи краток портрет на исклучителен новинар и публицист со богат новинарски опус, мајстор за речиси сите новинарски жанрови, за човек кој објавил десетици илјади текстови во пишани и електронски медиуми и кој објавил 12 монографии“, беше наведено во изнесениот портрет.

Книгата „Духовните светилишта на гостиварското архијерејско намесништво“ , која претставува еден вид енциклопедија на црквите и манастирите на Горнополошкиот Регион, Мавровско и Горнореканскиот Регион, на Шар Планина, Кораб, Бистра, Сува Гора, Букович и Горни Полог, ја промовираа Ратко Димитровски како издавач и отец Кирил, архимандрит на вселенскиот престол, како уредник.

„Големо задоволство ми беше да соработувам со господинот Кипроски за да делото излезе што поубаво, да го прикаже што поубаво она што тој го има кажано и со зборови и со фотографскиот апарат. Кога ја отпечативме книгата и му ја дадов во рака, се радуваше како мало дете, да ги пренесам неговите зборови во тој момент „Ова е невестата која долго време ја чекавме и сега сум многу задоволен“. Кога еден издавач ќе забележи такво задоволство кај авторот јасно е дека е голема работа“, подвлече Димитровски.

Отец Кирил рече дека монографијата почнала да се подготвува уште пред 24 години со благослов на тогашниот митрополит на тогашната Полошко-кумановска епархија г.Кирил, кој во пишана форма стои и на почетокот на книгата.

„На овој начин монографијата претставува исполнување на своевиден завет и носи со себе печат од времето и остава белег за вонвременост. Ова не е дело напишано со Гугл или со помош на вештачката интелигенција, туку дело со жива енергија, човечка есенција. Авторот со восхитување сведочи за љубовта на христијаните кон спасителот господ Исус Христос, а особено се фокусира на значењето на светата љубов во срцата на ктиторите на црквите и манастирите преку богатите описи, историски аспекти. Не само што го лоцира градот Гостивар и 40-тината гостиварски села во православното и културно наследство на Македонија, туку и ги открив, запишува деталите за 66-те цркви и параклиси како и за осумте манастири.“, нагласи Отец Кирил.

Новинарот Менде Младеновски, кој ја модерираше програмата, во една прилика кажа дека со славеникот имаат одлична соработка, потсетувајќи на важна доделена награда:

„Кипроски последните години е постојан дописник на нашиот „Битолски весник“, кој пред некое време прослави 59 години од излегувањето на првиот број. Лани на манифестацијата „Најуспешни битолчани“ Кипро, иако не е битолчанец заслужено го доби највисоко признание од областа на новинарството, за животно дело.“

Свое обраќање на настанот имаше и Игуменот на Бигорски, епископ Партениј кој нагласи дека Кипроски има нераскинлива врска со манастирот и е заслужен за негова позитивна промоција.

„Колку е поврзан со манастирот го покажа со тоа што го избра како место за прослава на својот 55 годишен јубилеј. Тој не избра друго место, туку го избра светилиштето кое толку многу го сака и стана негов многу голем и вреден летописец. Секогаш се изненадував од каде тој негов ентузијазам постојано да пишува, да доаѓа, да објавува текстови за Бигорскиот Манастир, нешто кое многу помогна за позитивната промоција на нашето братство, да ги надминеме сите пропаганди, искушенија кои ни се случуваа“, кажа Игуменот.

Во емотивно излагање, новинарот Кипроски сподели случка во Гостивар кога бил помлад новинар.

„Како млад новинар во 80-тите години присуствува на свеченост за „18 Номеври“ на која се доделуваа општински награди. Доајенот на македонската песна Александар Сариевски доби награда за животно дело и кога излезе на сцената да се заблагодари, рече: Мене господ ме надарил да пеам, а не да зборувам , па ја испеа песната „Дејгиди луди млади години“. Јас тогаш не можев да сфатам зошто повозрасните заплакаа. Но, сега ете знам што значи тоа и од каде солзите“, раскажа тој.

Програмата на јубилејот беше збогатена со настапи на монашкиот хор на манастирот „Свети Јован Крстител“ и познатиот пејач на народни песни Ванчо Тарабунов.