Коловозите се лизгави и има ризик од одрони, внимателно по патиштата – предупредување од полицијата

Последните дождови причинија влажни и лизгави коловози и отежнато движење на возилата, особено на високoпланинските патишта во Полог и пред се‘ по долината на Радика, најчесто доцнавечер и во раните утрински часови.

Доколку во наредните денови продолжи ваквото време и позначително се спуштат температурите, на овие патишта можна е појава и на голомразица, како и одрони од камења, како скорешните во близина на Трница, кои дополнително го зголемуваат ризикот за случување сообраќајни несреќи, алармираат од СВР Тетово.

„Апелираме до возачите да бидат крајно внимателни ако патуваат кон Стража, Маврово, Дебар или Попова Шапка, задолжително да поседуваат зимска опрема и да ја прилагодат брзината според условите на патот. На возачите им се советува, исто така, навреме да ја проверат техничката исправност на нивните возила и да не престигнуваат на непрегледни места.“, се вели во апелот.

Полициските службеници на Секторот за внатрешни работи Тетово и овој месец продолжуваат со засилени контролни активности, во чие средиште ќе биде техничката исправност на возилата, престигнувањето, како и брзината со која се движат. Техничките неисправните ќе се исклучуваат од сообраќај и ќе следуваат соодветни поднесоци, како и за пребрзите и алкохолизираните возачи, нагласуваат од полицијата.